Einangrunarstefna VG

Um þessar mundir er róið lífróðri og reynt að ausa leka þjóðarskútuna, en það vantar skýra stefnu til framtíðar. Eigum við að búa áfram við ónýtan gjaldmiðil sem haldið er uppi með gjaldeyrishöftum og hávaxtastefnu? Jón Bjarnason og VG verða að svara þessari spurningu, ekki hlakka yfir því að niðurstaða einhverrar skoðanannakönnunnar bendi til að fólk sé almennt ekki að velta fyrir sér aðild að ESB. Hvers vegna er ekki hægt að fara sænsku og norsku leiðina: að fara í aðildarviðræður, og bera síðan niðurstöður viðræðnanna undir þjóðaratkvæði. Þannig geta menn skipulagt fylkingar já- og nei- sinna, og tekist á um málið utan við flokkaskiftinguna. Þessa leið fóru menn í Noregi (tvisvar) og í Svíþjóð. Nei-liðar unnu í Noregi, Já-liðar í Svíþjóð. Þetta er lýðræðislegt, og með þessu verklagi kjósa menn á milli skýrra valkosta á grundvelli upplýstrar umræðu um kosti þess og galla að vera í eða utan ESB. Vangaveltur Jóns Bjarnasonar um að Samfylkingin sé að einangrast í ESB málinu eru bara til þess fallnar að skemmta skrattanum en færa okkur ekki nær svari við þeirri spurningu hvað sé til ráða nú þegar gjaldmiðillinn er endanlega gengisfelldur til ónýtis.

Ég hef verið á ferðalögum síðustu vikurnar. Ég sá skráningu gjaldmiðla í Nordea bankanum á Kastrúp flugvelli, og þar var andvirði íslensku krónunnar skráð sem 0.00. Ég spurði gjaldkerann hvort íslenska krónan væri virkilega skráð vera einskis virði. Svarið var að ég gæti alveg eins komið með hnefafylli af bréfaklemmum og beðið um að fá þeim skipt í peninga eins og að koma með íslenskar krónur og vilja fá alvöru peninga fyrir.

Segir Samfylkinguna að einangrast í ESB-umræðunni

Athugasemdir

[Davíð Snær (IP-tala skráð) 13.4.2009 kl. 17:46]

Er samt ekki dálítið barnalegt að halda að ESB aðild hafi bara að gera með hvaða gjaldmiðil við viljum nota? Aðild að ESB er miklu meira en bara Evran.

Ef árið væri 1933 værum við til í að gerast partur af nazista þýskalandi bara til að geta tekið upp þýska markið...

Þetta ESB er bara kjaftæði og fólk verður að byrja að horfa á þetta í aðeins stærra samhengi.

[Ólafur Ingólfsson, 13.4.2009 kl. 17:53]

Það er alveg rétt hjá þér að þetta snýst um mikið meira en gjaldmiðilinn. En hvorki þú eða ég vitum hvað aðild að ESB myndi þýða fyrir Ísland. Það kemur ekki í ljós fyrr en við höfum rætt við ESB og kannað málið. Hvers vegna eru VG, Styrmir Gunnarsson og Davíð Oddsson sammála um að það megi alls ekki ræða málið við ESB? Hvað vita þessir aðilar sem við vitum ekki? Hvers vegna eru menn svona hræddir við að leggja niðurstöður aðildarviðræðna í dóm þjóðarinnar? Ef þjóðin telur að niðurstöður viðræðna séu óaðgengilegar, þá hafna menn einfaldlega ESB aðild. Það gerðu Norðmenn. Svíar töldu sér betur borgið innan ESB, og samþykktu aðild í þjóðaratkvæðagreiðslu eftir aðildarviðræður. Getum við ekki farið sömu leið?

[Kári Gautason, 13.4.2009 kl. 18:04]

Í Noregi var að ég held bara kosið um hvort ganga skildi til aðildarviðræðna, ekki um einhvern samning.

[Axel Þór Kolbeinsson, 13.4.2009 kl. 20:18]

Tvisvar; '72 og '94.