Við björgum okkur sjálf, auðvitað

Það er alveg rétt hjá Dagfinni að ESB mun ekki bjarga Íslandi. Það verðum við að gera sjálf. Spurningin snýst ekki um það hvort ESB komi okkur til bjargar eða ekki, heldur hvort við veljum sjálf aðild að bandalaginu?

Ísland er í skelfilegri stöðu. Landið er nánast gjaldþrota, skuldugt upp fyrir haus og með gjaldmiðil sem er verðlaus utan Íslands. Við verðum að finna leið út úr þessum þrengingum. Það er ekki til nein einföld eða sársaukalaus leið. Við eigum eftir að sjá vaxandi atvinnuleysi, samdrátt rauntekna og kaupmáttar og skerta opinbera þjónustu á sviðum menntamála, heilbrigðismála og samgöngumála. Botninum er hvergi nærri náð í þessarri kreppu, og það á eftir að svíða hressilega áður en svo verður. Við verðum hins vegar að velja leið út úr þessarri kröppu lægð.

Við verðum að láta á það reyna hvort aðild að ESB geti veitt skjól í þessu ölduróti alþjóðlegra fjármálamarkaða og verið sásaukaminni leið út úr þrengingunum en að reyna að verjast áföllunum með alvarlega laskaða þjóðarskútu og verðlausan gjaldmiðil að verkfæri. Þjóðarskútan er uppá skéri, það þarf að draga hana á flot og gera haffæra á nýjan leik. Um það snýst málið. Þess vegna verðum við að ná sátt um samningsmarkmið okkar gagnvart ESB og fara út í aðildarviðræður. Ef niðurstöður þeirra eru óaðgengilegar mun aðild verða hafnað í þjóðaratkvæðagreiðslu. Ef þjóðin telur okkur betur borgið innan ESB, já þá göngum við í sambandið. Einfalt mál.

Evrópusambandið bjargar ekki Íslandi

Athugasemdir

[Hjálmtýr V Heiðdal, 28.4.2009 kl. 08:54]

Sæll Óli

Ég er búinn að virkja ESB skóna mína og geng í áttina að Evrópu. Ég er hissa á Atla Gísla að vera svona þevar. Eru þetta leifar af Noregsdvöl hans? Var hann ekki tengdur Eikinni?

Mér fannst skondið að á landsfundi Samfylkingarinnar voru a.m.k. 20 fyrrv. maóistar - hægta að starfrækja nokkrar sellur í flokknum.

Hvernig er best að koma af stað vitrænni umræðu um ESB meðal landsmanna. Ég hef fengið margar skrítnar athugasemdir inn á bloggið mitt þegar ég skrifa um málið.

Kanski þarf að gera góða fræðslumynd.

[Ólafur Ingólfsson, 29.4.2009 kl. 08:51]

Sammála að það þurfi að koma umræðunni um ESB í vitrænan farveg - það er allt of mikið um sleggjudóma, fullyrðingar og staðhæfingar sem eiga enga stoð í raunveruleikanum. Þetta á við um bæði andstæðinga og fylgjendur ESB aðildar. Ég bjó í Svíþjóð fyrir (12 ár) og eftir (5 ár) aðild svía að bandalaginu, og get fullyrt tvennt: í fyrsta lagi urðu engar grundvallalegar breytingar á sænsku samfélagi við inngönguna í ESB, þ.e. sænska velferðarríkið hélt áfram í sama farvegi og verið hafði. Í öðru lagi, það sem breyttist varðaði einkum stöðugleika í efnahagsmálum, verðbólga hjaðnaði og vöruverð lækkaði. Þá þýddi ESB aðildin stóraukna neytendavernd. Því má bæta við að andstæðingar ESB aðildar voru hræddir um að stóru og ríku löndin útí Evrópu (aðallega Þýskaland) myndu "gleypa" Svíþjóð, kaupa allt sem væri einhvers virði, taka yfir auðlindir landsins (námuiðnaður, skógariðnaður osfr) og sprengja upp sumarhúsamarkaðinn með yfirboðum osfr osfr. Þetta hefur einfaldlega ekki gerst. Hræðsluáróðurinn reyndist marklaus. Sama gildir um allt tal um að svíar myndu missa sjálfstæði sitt. Dettur nokkrum manni í hug að segja að Svíþjóð, Danmörk eða Finnland séu ekki sjálfstæð og fullvalda ríki?